A OBRA

"El triciclo" é unha das primeiras obras de Fernando Arrabal, máximo expoñente do Teatro do Absurdo no noso país, na que nos presenta, con toda a súa crueza, a personaxes desposuídos, a mercé da rúa, e que só dispoñen dunha propiedade, un vello Triciclo no que cada día dan viaxes aos nenos e nenas que hai no parque, a cambio dunhas calderillas, para poder ter un anaco de pan que botar á boca. Son personaxes excluídos, pertencentes a unha escala social que pasa desapercibida en demasiadas ocasións, pero que viven entre nós; a similitude cos actores e actrices da escola Ricardo Iniesta é grande xa que moitos destes, persoas con Diversidade Funcional, demasiadas veces non son tidas en conta.

Nesta adaptación, a obra está atravesada pola situación sanitaria e social absurda que vivimos nestes momentos de pandemia, e os personaxes son vítimas directas: un pallaso de circo e unha trapecista que xa non teñen circo no que traballar, un home que vive nun colector porque quedou sen casa, un menor non acompañado que atopa compaña na rúa e que loita en todo momento por atopar recursos económicos para pagar os prazos do triciclo que lles dá para comer nunha cidade na que os nenos e nenas xa non saen aos parques... Alén, o Capitalismo salvaxe, á espreita, disposto a servirse do que sexa para seguir sosténdose, e os vixiantes da lei, dunha lei ao servizo, demasiadas veces, dos que máis teñen.

ESCOLA MUNICIPAL DE TEATRO «RICARDO INIESTA»
Nada no ano 2000 a proposta de Luís Carlos Latorre e Nati Villar, a seu actual condutora, a Escola comezou como unha aula de artes escénicas da localidade, pero é a partir de 2003 cando comeza a crecer cara a unha proposta de teatro máis social, sendo xa todo un referente a nivel nacional. Corroboran este feito a súa participación en citas senlleiras como o Festival de Artes Escénicas e Inclusión Social (Conca), o Festival IGUALARCHE (Vigo), a Mostra Internacional de Teatro de Investigación MITIN (Sala TNT de Sevilla), o proxecto europeo Caravan Next ou o Festival Visibles (Sala Tarambana de Madrid)